Gutxienez 21 pertsona hil dira Indonesian, hainbat tokitan izandako uholdeen ondorioz

Gutxienez 21 pertsona hil dira urteko lehen egunean Jakarta eta Indonesiako hiriburuaren inguruko beste hainbat herritan izandako uholdeen ondorioz.

Tokiko agintariek azaldu dutenez, horietako herritar batzuk elektrokutatuta hil dira, eta euriteetan pilatutako urak Jakartako eremu ugari isolatu dituzte.

Hala, orain arte zenbatutako 21 heriotza horietatik, gehienak Mendebaldeko Java probintziako Bogor hirian gertatu direla zehaztu du Gizarte Gaietarako Ministerioak.

Indonesiak azken hamarkadan jasan duen uholderik larrienetako bat da, egunean 377 milimetroko euriteekin, The Jakarta Post tokiko egunkariak jakitera eman duenez.

Testuinguru horretan, eguraldiaren iragarpenaren arabera, euriteek Jakarta astintzen jarraituko dute larunbatera arte.

Adituek azaldu dutenez, euriteen intentsitatea hainbat faktorek eragin dute. Besteak beste, montzoiaren etorrerak eta Indiako ozeanotik eta Java uhartearen hegoaldetik zetozen haizeteek eta tenperatura altuek.