Genero-indarkeriaren kontrako zigorrak gogortu egin dituzte Mexikon

Mexiko Hiriko Parlamentuak ahobatez onartu ditu feminizidioa, hau da, emakumeak genero arrazoiengatik hiltzea delitu izan dadin Kode Penalari egin beharreko aldaketak. Horrenbestez 60 urteko kartzela-zigorra izango dute euren eskuz hil duten emakumearekin edozein motako harremana izan duten gizonek. Araudiaren arabera, berdin dio harreman hori odolekoa, bihotzekoa edo lan arlokoa den, hiltzaileek zigorrik gogorrena jasoko dute.

Legediari egin beharreko aldaketak ahobatez onartu bazituzten ere, Carlos Pizano Salinas eskuineko PAN alderdiko diputatuak adi egoteko eskatu zien gainerako parlamentariei, onartu berri dutena Mexikoko Konstituzioren kontrakoa izan daitekeelako. Uste hori izan arren, aldeko botoa emango zutela aurreratu zuen Pizanok.

Emandako azalpenen arabera, Kodeari egindako aldaketekin errugabetasun-presuntzioa urratu daiteke, eta horrenbestez legez utzi dezakete araudiari egindako aldaketa Konstituzioaren osotasuna jagoten duten epaileek.

Julio Cesar Moreno ezkerreko PRD alderdikide eta diputatuak erantzun zion zentzugabea dela proposamena legez kanpo dela esatea, batetik, eta haren aldeko botoa ematea, bestetik.

Proposamenaren eztabaidan hika-mikarik handienak hilketa horiek argitzeko Fiskaltza Nagusiari eskatuko zaion protokoloaren ingurukoak izan dira. Izan ere, ikerketak egiterakoan genero ikuspegia kontutan hartzeko exijituko zaie aurrerantzean Fiskaltzako adituei.

Mexiko Hiriko Emakumeen Institutuak txalotu egin du Kode Penalari egindako aldaketa. Kaleratutako agiri batean esan dutenez, "egunoko aurrerapausoa izan da hau hilketa horiek guztien inguruko inpunitatearekin amaitzeko, bai eta zeharkako biktimei kalte-ordainak bermatzeko ere".

Mexiko Hiriko Parlamentuak, bestalde, Kode Penalari eta Zibilari egin beharreko beste hainbat aldaketa ere onartu ditu. Aurrerantzean gartzelan sartuko dituzte emazte-ohiari seme-alabak elikatzeko epaileak zehaztutako dirutza ematen ez dioten gizonak. Hiru eta bost urte arteko gartzelaldia izango dute arau-hausleek. Erregistro Zibilak gizon horien guztien izenekin zerrenda egin beharko du, epaileek, Erregistro Publikoa eta Kreditu Bulegoak emandako datuekin.