Mundua -

KORONABIRUSA

NBEk mundu mailako su-etena eskatu du koronabirusagatik

Gerrek kaltetutako herrialdeak birusarekiko bereziki zaurgarriak direla ohartarazi du Nazio Batuen Erakundeko buruak.

Maliko emakumeak. Artxiboko irudia.
Maliko emakumeak
Maliko emakumeak. Artxiboko irudia.

AGENTZIAK | ERREDAKZIOA

Whatsapp Facebook Twitter Telegram Email

Antonio Guterres NBEko idazkari nagusiak gerra guztiak geldiaraziko dituen "mundu mailako su-etena" eskatu du koronabirusari aurre egiten laguntzeko.

"Gure munduak etsai komun bati egin behar dio aurre: COVID-19a", babestu du Guterresek prentsaurreko birtual batean, eta gatazka guztiak gelditzeko unea dela azpimarratu du, "gure bizitzako benetako borrokan" oinarritzeko.

Gerrek kaltetutako herrialdeak, osasun sistemak suntsituta dituztenak eta desplazatu eta errefuxiatu ugari dituztenak, birusarekiko bereziki zaurgarriak direla ohartarazi du Nazio Batuen Erakundeko buruak.

Guterresek azaldu duenez, borroketan etenaldia egiteak berebiziko laguntza emateko bideak sortzen lagunduko du, diplomaziarako aukerak zabalduko ditu eta "leku ahulenetara itxaropena eramatea" ahalbidetuko du.

Guterresen arabera, gatazka ezberdinetarako bidali bereziak alde guztiekin lanean ari dira, borroka gelditu eta dei horrek emaitzak ekarriko dituela ziurtatzeko.

"Ez dezagun ahaztu gatazkek suntsitutako eremuetan erantzuteko gaitasuna oso mugatua dela eta, borrokek jarraituz gero, izurritearen hedapen suntsitzailea izan dezakegu", adierazi du.

Azpimarratu duenez, su-eten global hori "guztiz funtsezkoa" da COVID-19aren aurkako erantzun eraginkorra lortzeko.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu arren, agintariek emandakoei bakarrik egin kasu. Zalantzarik baduzu edo gaitza hedatu den gune batera bidaian joan ostean sintomarik baduzu, Osasun Kontseiluaren telefonora dei dezakezu: 900 20 30 50 (EAE) eta 948 290 290 (Nafarroa). Gogoratu COVID-19 gaitza ez hedatzeko modurik eraginkorrena eskuak sarri garbitzea dela; ahoa estaltzeko maskarak bakarrik dira gomendagarriak sintomak badituzu edo adineko pertsonekin edo immunodeprimituekin harremanetan bazaude.

Hau zure interesekoa bada, baliteke beste gai hauek ere izatea
Nazioartea NBE Gaixotasunak Eguneko albisteak Albisteak Osasun albisteak Koronabirusa