Gadafi eta hartzaren larrua

Saif el Islam Gadafik propaganda-kolpea eman du, frogatuz ez dagoela atxilotuta eta Libiako hiriburua, Trípoli, ez dagoela oraindik errebeldeen esku. Eta Saif el Islam atzeman ez badute, are gutxiago bere aita, Muamar el Gadafi diktadorea, leku ezezagunen batean jarraitzen duena.

Ihes egiteko aukerak agortzen ari zaizkio. Hego Afrikak eta Errusiak esana dute ez dutela han espero. Oraindik Venezuela gelditzen zaio, Chavez presidenteak besoak zabalik hartuko du. Baina, bitartean, Saif el Islamek nazioarteko kazetariak dauden Rixon hoteletik egin duen paseoak, errebeldeen sinesgarritasuna kaltetu du. Eta ez da lehen aldia.

Sei hilabete hauetan, errebeldeek gezur ugari esan dituzte, edo behintzat, zehaztasun-ezak. Eta horrek zalantzan jarri du Trantsizio Kontseilu Nazionalak Libian demokrazia ezartzeko izango duen gaitasuna, Europako gobernuen gehiengoak Kontseilu hori onartu duen arren. Behin-behineko gobernu horren buru gadafista-ohi bat da: Mustafa Abdel Jalilek, Justizia ministro izandakoa baina, Kontseiluko osaketa nahasia da.

Ikusi beharko da Gadafiren gainbeheraren ondoren, Abdel Jalilek bere agintea ezarri ahal ote duen. Baina, horretarako, beharrezkoa da, horrenbestetan iragarri den Gadafiren amaiera hori, benetan gertatzea.