Alemaniako mapa politikoa, zatituta

Alemaniako Mecklemburgo-Antepomerania landean egindako hauteskundeek emaitza oso interesgarria utzi dute. Askok euren buruari egingo dioten galdera da ea non dagoen Mecklemburgo-Antepomerania eskualdea eta ze garrantzia duen horrek. Ba Alemania osoa kontutan hartuta eta batez ere biztanle kopuruari eta aberastasunari begiratuta, ez du garrantzia handirik. Garai batean Alemaniako Errepublika Demokratikoko parte zen, Itsaso Baltikoan dago, Poloniarekiko mugan.

Dena den, atzoko hauteskundeetan lortutako emaitzek agerian uzten du zein konplexua bihurtzen ari den Alemaniako politikagintza. Hasteko, NPD alderdi neonaziak presentzia izaten jarraituko du land horretako Parlamentuan, botoen % 5,6 eskuratuta ( behar adina beraz, % 5eko muga gainditu baitu).

Bigarrenik, Angela Merkel kantzillerraren kristau-demokratek Gobernutik kanpo jarraituko dute eskualde honetan, ia % 5 jaitsi baitira Merkel bera bertakoa izan eta bere ibilbide politikoa ere han hasi zuen arren.

Sozial-demokratek jarraituko dute gobernatzen, ia % 6 egin baitute gora, Berdeek % 8,5 lortu dute eta lehen aldiz land horretako Parlamentuan sartzea lortu dute eta Die Linke sozial-demokraten ezkerretara kokatutako ezkerrak berriz ordezkaritza sendoa lortu du, botoen % 18arekin.

Gauzak horrela, mapa politikoa oso zatituta geratu da eta horrek aurreikusten du datorren urteko hauteskunde federalek ere ikusmin handia piztuko dutela.