Mundua -
Udaberri Arabiarra
Islamiar moderatuek irabazi dituzte hauteskundeak Tunisian
Al Nahda Mugimenduak botoen % 41,6 eskuratu du Ben Aliren erregimenaren ondoren egin diren lehenengo hauteskundeetan.
Erredakzioa
Tunisian politikaren aro berria ari dira estreinatzen, diktadura atzean utzi eta lehenengo hauteskundeen ostean. Al Nahda Mugimenduko alderdi islamdar moderatuak irabazi ditu Tunisiako Batzar Nazional Konstituziogilea aukeratzeko hauteskundeak.
90 ordezkari lortu ditu Al Nahda alderdi islamdarrak, alegia, Tunisiako Batzar Nazionaleko 217 eserlekuetatik % 41. Bigarren indarrari alde handia atera diote islamdarrek. Errepublikaren Aldeko Kontseilua izeneko indar zentristak 30 ordezkari lortu ditu, eta hirugarren sozialdemokratak geratu dira: Lanaren eta Askatasunaren aldeko Forum Demokratikoak 21 ordezkari eskuratu ditu.
Ben Aliren erregimenaren aldekoek, berriz, bost ordezkari besterik ez dituzte lortu.
Ustekabekoa Al Arida alderdiaren arrakasta izan da, inkestetan apenas azaldu baita. 19 ordezkari atera ditu. Londresen bizi den enpresari batek sortua da alderdia, aurreko erregimenaren laguntzat jotzen dute Tunisian eta Londrestik bertatik hedatzen dira berea duen nazioarteko telebista-kate baten emanaldiak. Al Arida alderdi horri bost zerrenda baliogabetu dizkiote Tunisiako agintariek, hauteskunde eguneko isilaldia hausteagatik.
Bestetik, ezkerreko alderdiek ez dute babes handirik lortu, kanpaina osoan islamdarren aurka eta laikotasunaren alde ibili ondoren.
Hauteskundeetatik sortu den Batzar Nazionalak Konstituzio berria egin beharko du datorren urtebetean, eta aurreneko lana trantsizio-gobernu bat eratzea izango du.