Mundua -

AEB

Bidenek 87 boto irabazi ditu Wisconsinen, Trumpek ordaindutako zenbaketaren ondoren

Hauteskundeen emaitzen inguruko bi salaketa daude abian, Auzitegi Gorenak ebazteko zain.

Zenbaketa Wisconsinen. Argazkia: EFE
Wisconsingo zenbaketa
Zenbaketa Wisconsinen. Argazkia: EFE

Agentziak| Erredakzioa

Whatsapp Facebook Twitter Telegram Email

Joe Biden Ameriketako Estatu Batuetako presidente hautatuak 87 boto irabazi ditu Wisconsinen, Donald Trumpek finantzatutako zenbaketa partzialaren ondoren, hauteskundeen iruzurra salatzeko enegarren saiakeran.

Trumpek larunbatean adierazi duenez, zenbaketa berri honen helburua ez da desagertutako botoak aurkitzea, Bidenek azaroaren 3ko hauteskundeetan 21.00 botoko aldearekin irabazi zuen estatuan iruzurrezko boto-paperik dagoen argitzea baizik.

Zenbaketak demokraten aldekoak diren Dane eta Milwaukee konderriei eragin die. Lehenengoan, Trumpek 45 boto gehiago lortu ditu, baina Milwaukeen, berriz, Bidenek 132 gehiago eskuratu ditu, USA Today egunkariak jasotako informazioaren arabera.

Horrez gain, Trumpek hiru milioi dolar ordaindu ditu bi konderri horietako botoak berriro zenbatzeko gastuak ordaintzeko, estatu horrek Hauteskunde Batzordean dituen 10 botoak erreklamatze aldera, luze joko lukeen salaketa bat jartzeko.

“Wisconsingo zenbaketaren helburua ez da boto zenbaketan akatsak aurkitzea. Legez kanpo bozkatu duten pertsonak aurkitzea da xedea, eta zenbaketa amaitu ostean hasiko dira kasu horiek aztertzen”, argudiatu du larunbatean Trumpek twitter sarean duen kontuan.

Oraingoz, hauteskundeen emaitzen inguruko bi salaketa daude abian, Wisconsingo Auzitegi Gorenak ebazteko zain. Zenbaketaren emaitzak baztertzea eskatzen dute salatzaileek, errepublikanoek kontrolatzen duten Botere Legegileak erabaki dezan estatuak nola eman behar dituen dagozkion botoak Hauteskunde Batzordean.

Errepublikanoak nagusi diren Auzitegi Goreneko epaileek ez dute oraindik ezer esan.

Hau zure interesekoa bada, baliteke beste gai hauek ere izatea
Nazioartea Ameriketako Estatu Batuak Iruzurrak Hauteskundeak AEB Eguneko albisteak Albisteak Donald Trump Joe Biden