Mundua -
HAUTESKUNDEAK ALEMANIAN
Merkelen CDU alderdiak aise irabazi ditu Saxonia-Anhalteko hauteskundeak
Batasun Kristau-Demokratak 16 puntuko aldea atera dio bigarren postuan gelditu den ultraeskuinari. Irailaren 26ko hauteskunde orokorren aurretik egin diren azken bozak izan dira.
EITB MEDIA | AGENTZIAK
Alemanian, Angela Merkel kantzillerraren Batasun Kristau-Demokratak aise irabazi ditu igande honetan Saxonia-Anhalt estatu federatuan egin diren hauteskundeak. Guztira botoen % 37,1 eskuratu ditu, bigarren postuan gelditu den ultraeskuinari 16,1 puntuko aldea aterata. Inkestek berdinketa teknikoa edota sorpassoa iragartzen zuten.
Gaur zabaldutako behin-behineko datuen arabera, Angela Merkelen alderdi kontserbadoreak azken 19 urteotako emaitzarik onenak lortu ditu Saxonia-Anhalten. Aurreko hauteskundeekin alderatuta, % 7,3ko igoera izan du.
AfD Alemaniarentzako Alternatiba alderdi ultraeskuindarra bigarrena izan da, botoen % 20,8 (2016ko bozetan baino % 3,8 gutxiago) eskuratuta.
Hirugarren postuan ageri den ezkerrak botoen % 11 bereganatu ditu; beraz, % 5,3 egin du behera.
Sozialdemokratek hondoa jo dute Saxonia-Anhalten, inoizko emaitzarik txarrenak erdietsi baitituzte: botoen % 8 lortu dituzte.
FDP Alderdi Liberala eskualdeko parlamentura itzuli da, botoen % 6,4 eskuratuta.
Parlamentuan ordezkaritza lortu duen seigarren eta azken alderdia Berdeak izan da (% 5,9).
CDUk 40 eserleku lortu ditu Parlamentuan, AfDk 23, ezkerrak 12, SPDk 9, FDPk 7 eta Berdeek 6. Gehiengoa 49 eserlekutan dago, eta, ondorioz, CDUk gobernua osatzeko aukera ugari izango ditu.
Irailaren 26ko hauteskunde orokorren aurreko azken hitzordua zen atzokoa.