Mundua -
Goi-bilera
Putinek eta Bidenek enbaxadoreak Washingtonera eta Moskura itzultzea adostu dute
Bestalde, bi agintariek zibersegurtasunari buruzko batzarrak egiteko prestutasuna agertu dute. Buruzagi errusiarrak adierazi du Navalni "atxiloketa bilatzen" ari zela.
agentziak | eitb media
Vladimir Putin Errusiako presidenteak, Joe Biden AEBko presidentearekin goi-bilera egin ostean, iragarri du bere herrialdeko eta AEBko enbaxadoreak Washingtonera eta Moskura itzuliko direla, hurrenez hurren.
"Arazoa konponduta dagoela adostu dugu, eta zerbitzua emateko leku iraunkorrera itzultzen ari dira", adierazi du Putinek ontzat jo duen batzarraren osteko prentsaurrekoan.
Errusiako eta AEBko enbaxadoreek apirilean utzi zuten lantokia, Bidenen Gobernuak Errusiari "desegonkortzeko ekintzak" egotzi eta isunak ezarri ondoren.
Zibersegurtasuna
Une hartan, AEBko Administrazioak Errusiako Atzerri Inteligentzia Zerbitzuari egotzi zion SolarWinds enpresaren aurkako zibererasoa, 2021eko hasieran Gobernuaren 10 agentziari eta 100 enpresa pribaturi eragin ziena.
Horren harira, AEBko presidentearekin bildu ostean, Putinek iragarri du egonkortasun estrategikorako eta zibersegurtasunerako bilera sorta bat egingo dutela, azken hori bereziki garrantzitsua dela iritzita.
Navalni
Bestalde, Alexei Navalni opositore errusiarra ere izan du hizpide, eta Putinek azpimarratu du "atxiloketa bilatzen" ari zela Errusiara itzultzea erabaki zuenean.