Uholdeek eta luiziek gutxienez 138 hildako eta ia 90.000 ebakuatu utzi dituzte Indian

Azken orduetan euri-jasa bortitzak izan dira Indiako Maharashtra estatuan (mendebaldea). Dagoeneko 138 pertsona hil dira uholdeen eta luizien ondorioz, buruzagiek larunbat honetan jakitera eman duten azken balantze ofizialaren arabera.

Bereziki Konkan eskualdea astindu dute euri-jasek. Uholdeek milaka pertsona harrapatu dituzte. Bitartean, agintariek helikopteroak zabaldu dituzte Raigad eskualdean, Mumbaitik 70 kilometrora, kaltetuak ebakuatzeko.

Gutxienez 84.452 pertsona, horien artean 40.000 baino gehiago Kolhapur barrutian, ebakuatu behar izan dituzte Punen, Mendebaldeko Maharashtran, buruzagien arabera. Uholdeek gutxienez 54 herrixkari eragin diete.

Maharashtran eta Mumbai hiriburuan izan dira hildako gehien. Horrela, 47 pertsona hil dira Raigaden, Sagar Pathak hondamendiak kudeatzeko arduradunak jakitera eman duenez. Beste 36 pertsona herrixka bakarrean hil dira, Taliyen, hain zuzen ere. Luizi batek herrixka estali du.

50 pertsona inguru desagerturik edo harrapaturik daude. Azken 40 urteetan estatuan izan diren euri-jasa bortitzenak dira.

Teilatuetara igotzeko edo goialdeetara joateko eskatu diete buruzagiek herritarrei, erreskate taldeek ikusi ahal izateko.