Europar Batasuna: herstura, bai; hazkuntza, non?

Europako Kontseiluaren atzoko bilerak b helburu jakin zituen: herstura fiskala hitzartzea eta langabeziari aurre egiteko neurriak onartzea, gehienbat gazteen langabeziari dagokionez. Lehenengo helburua bete dute agintari europarrek baina bigarrena ez. Itun fiskalak neurri zehatzak jasotzen ditu eta ondo xehetutako ituna da. % 0,5-eko defizit muga finkatzen du eta Europako epaitegien aurrera eramateko aukera muga hori gainditzen duten estatuentzat.

Horrez gain zigorra ere aurreikusten du betetzen ez duen herrialdearentzat, herrialdeak duen Barne Produktu Gordinaren ehuneko 0,1-era irits liteke zigor hori. Aldiz hazkundea sustatu eta langabeziari aurre egiteko proposatzen diren neurriak askoz orokorragoak dira, eta garrantzitsuena, dirurik ez dagoela mahai gainean.

Europar Batasuneko buruzagiek erabaki dutena zera da Europako aurrekontuetatik gastatu ez den dirua enplegua sustatzeko proiektuetara bideratzea. Fondo horiek, ordea, jada horretarako erabiltzen dira, azpiegitura handien proiktuetarako, eskualdeen garapenerako eta lan formazioa laguntzeko. Europar Batasunak, beraz, ez du dirurik jartzen, lehen zegoena banatu baizik. Gauzak honela herstura fiskala eta hazkunde ekonomikoa bateratu behar zirela zioen adierazpena ezerezean geratu da. Oraingoz begibistan dagoen bakarra herstura da, hazkundearen arrastorik ez bait da ageri.