Britney Spearsen aitak abeslariaren legezko tutore izateari utziko dio, 13 urteren ostean

Jamie Spearsek, Britney Spearsen aitak, artistaren legezko tutore izateari utziko diola iragarri du, 13 urteren ostean. Urteotan abeslari estatubatuarraren bizitzako esparru gehienak kontrolatu ditu gizonak, alabak salatu duenez. Gaur egun 40 urte ditu Britney Spearsek.

Tutoretza beste pertsona baten esku uzteko agiriak ostegun honetan aurkeztu ditu aitaren abokatuak Los Angeleseko Auzitegi Gorenean. Dena dela, trantsizioa ez da berehala gauzatuko.

Jamie Spearsen hitzetan, ez dago tutoretzari muzin egiteko "arrazoi zehatzik" eta atzera egin badu jasandako presio sozialagatik izan da.

"Pozten gara Spears jaunak eta haren abokatuak tutoretza uzteko erabakia onartu dutelako. Britneyren aldarrikapen bat da", azpimarratu du Mathew Rosengart artistaren abokatuak.

Rosengartek duela bi hilabete hartu zuen Britneyren interesak defendatzeko ardura. Aitak abeslariaren dirutza nola kudeatu zuen ikertzen ari da, eta iragarri du hainbat irregulartasun topatu dituela jada.