Zeelanda Berrian konfinamendua ezarri dute hiru egunez, herritar batek covid-19an positibo eman ondoren

Zeelanda Berriak etxeko konfinamendua ezarri du hiru egunez, herritar batek covid-19an positibo eman ondoren. Hain zuzen ere, neurri murriztaile horrek bost milioi pertsonari baino gehiagori eragiten die. Tokiko agintariek azaldu dutenez, delta aldaeraren lehen agerraldiari aurre egitea da asmoa; izan ere, ostegun honetara arte hamar kasu atzeman dituzte.

"Gaitza atzemateko frogek baieztatu dutenez, delta aldaerarekin kutsatu da koronabirusean positibo eman duen herritar horrek. Sekuentzia genomikoaren arabera, Hegoaldeko Gales Berriko agerraldiaren infekzioei lotuta dago", azaldu die Jacinda Ardern Zeelanda Berriko lehen ministroak kazetariei, Wellingtonen egindako agerraldian.

Zeelanda Berriko lehen ministroak ahalegin handia egin du covid-19ari aurre egiteko, eta mundu osoan txalotu dute pandemiaren kudeaketa. Testuinguru horretan, herrialdean bizi diren bost milioi biztanle baino gehiago konfinatu ditu hiru egunez, baina Auckland hirian eta Coromandel penintsulan bizi direnak zazpi egunez konfinatuta egongo dira.

Ia sei hilabetean lehen aldiz, Aucklandeko herritar baten kutsatzea baieztatu ondoren ezarri dute neurri murriztaile hori. Izan ere, positibo eman duen pertsona hori, asteburuan Coromandelera joan zen, kutsatuta zegoela jada.

Ordutik, bederatzi kasu gehiago atzeman dira, horien artean, Aucklandeko ospitale batean lan egiten duen pertsona bat. Zehazki, hiri horrek 1.700.000 biztanle ditu eta herrialde horretako hiririk jendetsuena da, baina adituek uste dute 50 eta 120 pertsona artean kutsatu direla konfinamendua indarrean sartu aurretik.