Mundua -
AEB
Joe Bidenek Qatarrera begiratu du gas horniduraren inguruko beldurren aurrean
AEBk astelehen honetan iragarri duenez, pribilegio militarrak eta ekonomikoak emango dizkio Qatarri, Errusiak Ukrainako krisiaren harira Europari gas hornidura moztuz gero.
AGENTZIAK | EITB MEDIA
Ameriketako Estatu Batuetako Gobernuak pribilegio militarrak eta ekonomikoak emango dizkio Qatarri, Ukrainako krisia tarteko, Errusiak Europako gas hornidura etengo duen beldur.
Joe Biden AEBko presidentea Tamim bin Hamad al Zani Qatargo emirrarekin elkartu da bart bulego obalean. Bertan azaldu dionez, Qatar "NATOko kide ez den aliatu nagusi" gisa izendatzeko asmoa du, pribilegio ekonomiko eta militarrak dakartzan estatus berezia.
"Qatar lagun ona da, bazkide ona eta fidagarria", adierazi du Bidenek iragarpena egin duenean.
Qatar gas naturalaren munduko ekoizle handienetakoa da. Etxe Zuriak baieztatu duenez, Qatarrekin hizketan ari da Europar Batasunari gas horniduraren alternatibak aurkitzen laguntzeko.
Gaur egun, Qatar Europar Batasunaren laugarren gas natural hornitzaile handiena da (% 5,2), Aljeria (% 8), Norvegia (% 16) eta Errusia ( % 41) aurretik dituela, Eurostaten 2019ko datuen arabera.
