Mundua -
Ukrainako gerra
NATOk adierazi du tropa errusiarrak ez direla Ukraina iparraldetik erretiratu
Errusiako Gobernuak iragarri zuen Kieven aurkako erasoak murriztuko zituela, Ukrainarekin izaten ari diren negoziaketak errazte aldera. Alabaina, NATOk ohartarazi du tropa errusiarrak "berrantolatzen" ari direla, "eta ez erretiratzen".
AGENTZIAK | EITB MEDIA
NATOk adierazi du Errusiak ez dituela bere tropak erretiratu Kiev ingurutik eta Ukraina iparraldetik, Donbassen pilatzeko, aste honetan Moskuk iragarri duen moduan.
Errusiako Gobernuak jakinarazi zuen Kieven eta Ukraina iparraldean "nabarmen murriztuko" zituela eraso militarrak, Ukrainarekin izaten ari diren negoziaketak errazte aldera.
Alabaina, Jens Stoltenberg NATOko idazkari nagusiak salatu du ez dutela emandako hitza bete. "Errusiak sarritan esan du gezurra bere asmoen harira, eta egiten duena soilik hartuko dugu kontuan. Gure inteligentziaren arabera, tropa errusiarrak berrantolatzen ari dira, baina ez dira erretiratu", ohartarazi du.
"Tropa errusiarrak Donbassen biltzen ari dira, berriro hornitzeko eta erasoaldi militarra sendotzeko", erantsi du.
"Aldi berean, Kieven eta beste hiri batzuen aurkako jazarpenari eusten dio eta, beraz, eraso gehiago izango direla eta sufrimendu gehiago eragingo dutela aurreikusten dugu", nabarmendu du.
"Errusiak zentzurik gabeko gerra honi amaiera eman dio, bera tropa guztiak erretiratu behar ditu eta zintzotasunez heldu behar dio elkarrizketari", adierazi du.