Mundua -
Ukrainako gerra
Hegazkineriari aurre egiteko gaitasuna duten tankeak entregatuko dizkio Alemaniak Ukrainari
'Gepard' gerra-gurdiak dira, Alemaniako Defentsa ministroak iragarri duenez. Bestalde, Ekonomia ministroaren hitzetan, Alemania Errusiako petrolioa baztertzeko prest egongo da datozen egunetan.
Agentziak | EiTB Media
'Gepard' tankeak Ukrainari entregatuko dizkiola iragarri du Alemaniako Gobernuak astearte honetan. Hegazkineriari aurre egiteko gaitasuna duten gerra-gurdiak dira.
Ukrainari armamentu astuna ez entregatzeagatik kritikak jaso ditu Berlinek azken asteetan. Zentzu horretan, 'Gepard' tankeak bidaltzeko erabakia aurrerapauso bezala deskribatu du Christine Lambrecht Alemaniako Defentsa ministroak.
Lambrechten ahotan, Errusia Ukrainan egiten ari denarekin "nazio zibilizatuen taldetik atera da".
Defentsa ministroak azaldu duenez, "Ukrainak sistema antiaereoak premiaz behar baldin baditu, Alemania babesa emateko prest dago". "Ukraina laguntzen jarraitzeko bideak aztertuko ditugu", ziurtatu du.
Era berean, soldadu ukrainarrek artilleria sistemak erabiltzeko entrenamendua Alemanian jasoko dutela iragarri du ministroak, DPA albiste-agentziak jakitera eman duenez.
Errusiako petrolioa baztertzea datozen egunetan
Bestalde, Robert Habeck Alemaniako Ekonomia ministroak esan duenez, Errusiako petrolioa baztertzeko prest egongo dira datozen egunetan.
"Gaur esan dezaket petrolioaren blokeo bat Alemaniarentzako bideragarria dela", onartu du Ekonomia ministroak Varsovian, Poloniako hiriburuan. Anna Moskwa Poloniako Ingurumen ministroarekin bildu da.
Errusiaren petrolioarekiko nolabaiteko independentzia dagoeneko lortu dutela adierazi du Habeckek; izan ere, otsailaren amaieran, gerra baino lehen % 35eko menpekotasuna zuten, eta gaur % 12koa da, apenas zortzi aste igaro ondoren.