Mundua -
FRANTZIAKO HAUTESKUNDEAK
Sozialistak ezkerreko koaliziora batzeko aurreakordioa lortu dute Frantzian
Alderdi Sozialistaren zuzendaritzak berretsi behar du aurreakordioa. Baieztatuko balitz, oraingoz Frantzia Intsumisoak, Berdeek eta Alderdi Komunistak osatzen duten ezkerreko alderdien arteko koaliziora batuko litzateke.
AGENTZIAK | EITB MEDIA
Ekainaren 12an eta 19an Frantzian egingo diren hauteskunde legegileei begira, Alderdi Sozialistak aurreakordioa lortu du Jean-Luc Melenchon buru duen Frantzia Intsumisoa alderdiarekin sozialistak ezkerreko koaliziora batu daitezen.
Alderdi Sozialistaren Batzorde Nazionalak berretsi beharko du aurreakordioa. Besteak beste, hauteskunde legegileetan barrutiak nola banatu adostu dute, baita programa bat ere, Adrien Quatennens Frantzia Intsumisoaren bozeramaileak France Info irrati katean adierazi duenez.
Gaur-gaurkoz, Frantzia Intsumisoak, Berdeek eta Frantziako Alderdi Komunistak osatzen dute ezkerreko alderdien arteko koalizio hori.
Dena dela, oraindik ere zabalagoa izan daiteke; izan ere, Melenchonen alderdia Alderdi Antikapitalista Berriarekin negoziatzen ari da.