Txilek ezezkoa eman dio Konstituzio berriaren proposamenari

Ezezkoak botoen % 62,5 jaso du. Modu horretan, herrialdeak gaur egunean duen Konstituzioari eutsiko dio, Pinocheten diktaduran idatzitakoari, alegia. Gabriel Boric herrialdeko presidenteak, bere aldetik, "Txileko herriak ozen eta garbi hitz egin du" adierazi du emaitza jakin ondoren.

Txileko kaleak emaitza ospatzen zuten pertsonez bete dira. Argazkia: EFE. — Botoen % 62rekin, Konstituzio berriaren aurkako jarrera nagusitu da Txilen

AGENTZIAK | EITB MEDIA

publikatuta: 2022/09/05 07:25 (UTC+2)

azken eguneratzea: 2022/09/05 14:50 (UTC+2)

Txilek ezezkoa eman dio Konstituzio berriaren proposamenari botoen % 62,5ekin, eta aurreko testuari eutsi dio, Pinocheten diktaduran idatzitakoari, hain zuzen ere.

Beraz, Carta Magna berria onartzeko aukera hautesleen % 37,8k baino ez du babestu.

Hainbat pertsona Txileko hirietako kaleetara atera dira ezezkoaren garaipena ospatzera.

Gabriel Boric herrialdeko presidenteak, bere aldetik, "Txileko herriak ozen eta garbi hitz egin du" adierazi du emaitza jakin ondoren.

Halaber, herrialdean prozesu konstituziogile berri bat bultzatzeko konpromisoa hartu du. Agintariak adierazi duenez, elkarrizketak izango ditu Kongresuarekin eta gizarteko taldeekin "herrialdearen aurrean prozesu konstituziogile berri bat ezartzeko konpromisoa hartu duten sektoreen proposamenak biltzeko".

Presidenteak aurreratu du eragile batzuekin hitz egin duela dagoeneko, eta ezberdintasunetatik haratago "hitz egiteko borondatea gailentzen" dela.

Era berean, datozen egunetan bere kabinetea eraberritzeko aukera airean utzi du.

Gabriel Boricek Txilen prozesu konstituziogile berria bultzatzeko konpromisoa hartu du