Zaporizhiako zentralaren inguruan segurtasun-gunea sortzea eskatu du NBEren agentzia nuklearrak

Energia Atomikoaren Nazioarteko Erakundeak, alegia, NBEren agentzia nuklearrak, gomendatu du, Zaporizhiako zentral nuklearrean berriki egindako bisitaren ostean, zentralaren inguruan segurtasun-gunea sortzea. Horren helburua da balizko hondamendi erradioaktiboa saihestea.

"Horrek eskatzen du alde guztiak ados egotea, segurtasun nuklearreko gunea ezartzeko", dio erakundearen txostenak. Astearte honetan zabaldu dute txosten hori, Vienan.

Indar errusiarren mendean dago Zaporizhiako zentrala, eta astelehen arratsaldean deskonektatu zuten ukrainar saretik. Bonbardaketak izan dira bertan, eta Errusiak eta Ukrainak elkarri egozten diote horien errua. Bonbardaketa horien ondorioz, azken hilabeteotan hondamendi nuklearra gertatzeko arriskua dago.