Mundua -
Europar Batasuna
EBko liderrek neurri "argiak" eskatu dizkiote Bruselari gas merkatuan esku hartzeko, ondorengo bi asteotan
Hurrengo goi bilera urriaren 20an eta 21ean egingo dute: "Espero dugu ez izatea zehaztugabeko proposamen gehiago, baizik eta zerbait zehatzagoa", esan du Mario Draghik Pragan, Europar Batasuneko kide diren herrialdeetako Estatuburuen eta Gobernuburuen bilera amaituta.
EITB MEDIA
Europar Batasuneko Estatuburuek eta Gobernuburuek eskatu diote ostiralean Bruselari aurkez dezala, urriaren 20ean eta 21ean izango den goi bilera egin aurretik, gas merkatuan esku hartzeko proposamen "argi eta zehatzak"; neurriak orain arte aztertu dituzten ideia zehaztugabeetatik harago joan beharko lirateke, Italian lehen ministro kargua utziko duen Mario Draghik aurreratu duenez, Pragan izandako bilera amaituta.
"Urriaren 19ra edo 20ra itxaron behar dugu Ursula von der Leyen Batzordeko presidentearen hitz gehiagorik ez izateko, zehaztugabeko proposamen gehiagorik ez, baizik eta zerbait argiagoa izateko, zehatzagoa, eta, hein batean, araudi proposamenak", azaldu du Draghik prentsari, Europar Batasuneko liderren goi bilera informala bukatuta. Kide diren herrialdeen helburua izan da, bileran, erreforma energetikoak bideratzea.
Italiar agintariak adierazi du ez dituztela eztabaidatu Bruselaren aldetik espero dituzten proposamenen zehaztasunak; halaber, gogora ekarri du EBko txekiar presidentetzak aurreikusita duela egitea "behar beste bilera, Energia ministroekin, urriaren 20ko eta 21eko Kontseilu Europarra baino lehen, proposamen zehatza adosteko".
