'Mahomaren inguruko pelikularen ekoizleak iruzurra egin zidan'

Joseph Nassralla aktibista egiptoar-estatubatuarrak, Innocence of Muslims (musulmanen inozentzia) Mahomaren inguruko pelikula grabatu zuten telebista estudioen jabeak, pelikularen ekoizleak iruzur egin ziola adierazi du.

Interneten publikatutako ohar batean, ekoizleak, Nakoula Basseley Nakoulak, pelikularen edukia berari ezer esan gabe aldatu zuela eta “desinformazioaren eta sinesgarritasuna kentzeko saiakera baten biktima” dela esan du Nassrallak (islamdarren kontrako aktibista). Banku-iruzurrarekin eta drogekin erlazionatutako delituak leporatu dizkiote Nakoulari, pelikularen ekoizleari, eta inork ez daki non dagoen.

Estudioaren jabearen esanetan, pelikularen izenburua ‘Basamortuko Gerlaria’ izango zela esan zion ekoizleak, eta helburua “desertuaren kultura eta horrek egunerokotasunarekin duen erlazioa aztertzea” izango zela gaineratu du.

Nakoularen abokatu batek esan duenez, baliteke filmaren ekoizleak berak ala haren ordezkariek laster ohar bat igortzea.