Al Asadek bere erregimena ez dela eroriko esan du

Bachar al Asad Siriako presidenteak esan du bere erregimena ez dela eroriko, eta oposizio armatuari terrorismoa Estatuko erakunde guztien aurka praktikatzea leporatu dio, gainera, ez duela arrakastarik izango nabarmendu du.

"Irtenbidea barne elkarrizketa baten bitartez jarriko zaio", azaldu du Al Asadek bihar "Ahram al Arabi" aldizkarian argitaratuko den elkarrizketaren aurrerapenean.

"Aldaketa ezin da gauzatu erregimeneko buruak desagertzea eginez edota atzerriko esku hartze baten bitartez" adierazi du Siriako agintariak. Halaber, Gobernua ez dela eroriko eta Libiako eredua ez dela Sirian errepikatuko nabarmendu du.

Al Asadek esan duenez, oposizio armatuak terrorismoa praktikatzen du eta armak uzten dituztenei indultatzeko ekimenak azpimarratu ditu, barne elkarrizketa bultzatzeko.

Turkiari, Katarri eta Saudi Arabiari eraso egin die ustez matxinatuei armak emateagatik eta laguntzeagatik.

Turkiarrak kritikatu ostean, bere hitzetan, Gobernuko alderdiaren interesen alde egitera pasatu direla gaineratu du. Al Asaden ustez, "Ekialde Ertaineko oreka estrategikoaren triangelua beti Egiptok, Siriak eta Irakek osatuko dute".

Halaber, akatsak eta ustelkeria izan direla onartu du, baina horri aurre egiten ari direla eta Gobernuak erreformekin (konstituzioarena barne) jarraituko duela azaldu du.