Mundua -
UKRAINAKO GERRA
Zelenski prest legoke Errusiak okupatutako lurraldeei uko egiteko gainerako lurraldea NATOn sartuz gero
Ukrainako presidentearen arabera, aukera hori posible izango da baldin eta armamentu gehiago bidaltzea adosten badute. Halaber, Errusiari zigor gehiago jartzeko beharra defendatu du.
AGENTZIAK | EITB Media
Volodimir Zelenski Ukrainako presidentea prest legoke Errusiak okupatutako lurraldeei uko egiteko, baina nabarmendu du herrialdearen gainerako zatia NATOn sartzea adostu beharko luketela hori gertatzeko.
NATOn sartzearen truke, Luhansk, Donetsk, Zaporizhia, Kherson eta Krimea lurralderik gabeko Ukraina bat onartuko ote lukeen galdetu dio Lex Fridman ukrainar jatorriko elkarrizketatzaile estatubatuarrak Ukrainako presidenteari.
Edozein kasutan, Zelenskik nabarmendu du aukera hori posible izango dela baldin eta armamentu gehiago bidaltzea adosten badute. Azaldu duenez, arma bidalketa hori Europar Batasunarekin eta Ameriketako Estatu Batuekin hitzartu beharko dute.
Gainera, Donald Trump Etxe Zurira iristen denean Errusiari zigor gehiago jartzeko beharra defendatu du Zelenskik, Moskuk hidrokarburoak saldu ez ditzan.
Dena den, gerra amaitzeko lehen pausoa Trumpekin elkartzea dela esan du Ukrainako presidenteak. "Gerra eta Putin nola gelditu adostu behar dugu Trumpekin. Guretzat oso garrantzitsua da Europak ere bere ahotsa izatea auzi honetan", azaldu du.
Trumpekin egindako bilera horrek Ukrainarentzako segurtasun bermeak zehazteko balioko lukeela gaineratu du. "Ez gara hirurok negoziazio mahai berean eseriko", esan du Errusia, Ukraina eta AEBri erreferentzia eginez.