Hamas: "Orain Gazaren setioa amaitzeko eta herritarrei laguntza eta aterpea emateko unea da"

Gazako Zerrendan Israelekin adostutako su-etena hastear denean, Hamas talde islamistak esan du orain "setioa amaitzea" dela helburua, eta herritarrei "laguntza eta aterpea" eman behar zaizkiela, Israelgo Armadaren 15 hilabeteko erasoaldiaren ostean eremua erabat suntsituta eta herritarren % 90 etxetik kanpo daudelako.

"Orain dugun egitekoa da setioa amaitzea, gure herritarrei laguntza eta aterpea ematea, zauriak sendatzea, lekualdatuak ekartzea eta berreraikitzea", adierazi du talde islamistak ohar batean.

Oharrean, txalotu egiten du 2023ko urriaren 7an egindako erasoa (1.200 israeldar hil eta 251 bahitu zituzten), ondoren Israelen kontraerasoan 46.800 palestinar hil diren arren.

"Al Aqsa hondoratzeko operazioak okupazioaren amaierara gerturatu gaitu, askapenera eta itzulerara", azpimarratu du Hamasek.

"Okupatzaileak (Israel) ez ditu bere helburuak lortu, eta gizateria lotsatzen duten gerrako krimenak soilik egin ditu", gaineratu du.

Indarrak berriro zabaltzea

Mugimendu islamistako agintariek, gainera, iragarri dute su-etena hasi bezain laster segurtasun-indarrak berriro zabaltzen hasiko dela Gazako Zerrendako "agintaritza guztietan", akordioa betetzen dela egiaztatzeko.

"Barne eta Segurtasun Nazionaleko Ministerioa Gazako Zerrendako agintaritza guztietan zabalduko da, eta gure herriaren esanetara jartzeko betebehar sakratua beteko du gerra eteteko akordioa indarrean jarri bezain pronto", adierazi du Hamasek oharrean, Sanad albiste-agentziak zabaldu duenez.   

Hori horrela, herritarrei eskatu die "segurtasun arduradunei laguntzeko" eta "datozen egunetan agintariek emango dituzten agindu guztiak betetzeko".

AEBk gerraosterako aurkeztutako egitasmoak aurreikusten duenaren arabera, Palestinako Aginte Nazionalak (Mahmud Abbasen Fatah alderdiaren kontrolpean dago) hartuko du agintea Gazako Zerrendan. Benjamin Netanyahu Israelgo lehen ministroa Hamasek berriro Zerrendaren kontrola hartzearen aurka dago guztiz.