Mundua -

Amerika

Mexikoko mugan 1.500 militar gehiago zabaltzeko agindua eman du Trumpek

Errefortzu horiek Texasko Guardia Nazionaleko 4.500 erreserbistei eta jardunean dauden 2200 militarrei gehituko zaizkie. Lehen agintaldian (2017-2021), Trumpek Mexikoko mugara 5.200 soldadu bidali zituen.

Soldadu estatubatuarrak Mexikoko mugan. Argazkia: EFE
Soldadu estatubatuarrak Mexikoko mugan. Argazkia: EFE
Soldadu estatubatuarrak Mexikoko mugan. Argazkia: EFE

Agentziak | EITB Media

Whatsapp Facebook Twitter Telegram Email

Donald Trump Ameriketako Estatu Batuetako (AEB) presidenteak Mexikoko mugan 1.500 soldadu zabaltzeko agindua eman du. Horrela, pertsona migratzaileei pasabidea "ixteko" eta mugako segurtasuna indartzeko promesa betetzeko saiakeran lehen pausoa eman du, AEBko komunikabideek gaur jakitera eman dutenez.

Pentagonoak ez du operazioari buruzko informazio ofizialik zabaldu, ezta noiz egingo den esan ere. Karoline Leavitt Etxe Zuriaren bozeramaileak, ordea, kazetarien aurrean azaldu du Trumpek 1.500 militar zabaltzeko agindua sinatu duela.

Errefortzu horiek Texasko Guardia Nazionaleko 4.500 erreserbistei eta jardunean dauden 2.200 militarrei gehituko zaizkie. Lehen agintaldian (2017-2021), Trumpek Mexikoko mugara 5.200 soldadu bidali zituen.

Astelehenean, Presidentetza berriro hartu eta ordu batzuetara, Pentagonoak "Estatu Batuetako hegoaldeko mugaren kontrol operatibo osoa" lortzeko tropak mobilizatzeko agindua sinatu zuen.

Era berean, aginduak ezartzen du Trumpek hurrengo 90 egunetan aztertuko duela 1807ko Matxinada Legea baliatzeko aukera, horrek militarrei emango liekeelako herrialdean legea aplikatzeko funtzioak bere gain hartzeko, segurtasun indarrek betetzen duten papera hartuz.

Gaur egun, mugan dauden soldaduek ez dute baimenik polizia lanak egiteko, hala nola pertsona migratzaileak atxilotzeko eta drogak konfiskatzeko.

Claudia Sheinbaum Mexikoko presidentea. Argazkia: EFE

Claudia Sheinbaum Mexikoko presidentea. Argazkia: EFE

Sheinbaumek "lasai egoteko" deia egin du Trumpen dekretuen aurrean

Bestalde, Claudia Sheinbaum Mexikoko presidenteak "buru hotzarekin" erantzun nahi izan zion atzo bere herrialdearen aurkako dekretuei.

"Garrantzitsua da beti zuhurtasunez jokatzea eta sinatutako dekretuei erreparatzea, hitzaldiaz harago, hau da, legearen zentzu hertsian Trump presidenteak sinatzen dituen dekretuek dute balioa, orduan testuinguru osoa jarriko dugu", adierazi zuen agintariak goizeko hitzaldian.

Sheinbaumek agindu zuen "beti" defendatuko duela Mexiko beste ezeren gainetik, baina Trumpen dekretuen aurrean "lasai egotea garrantzitsua" dela gaineratu zuen.

Gaur bertan, Mexikoko presidenteak baieztatu du Juan Ramon de la Fuente Atzerri ministroak elkarrizketa izan duela Marco Rubio AEBko Estatu idazkari berriarekin.

Sheinbaumek Estatu idazkari berriaren lehen elkarrizketa ofiziala izatea goraipatu du, eta Mexiko eta AEB bi estatuei eragiten dieten "gaietan" akordioak lortzeko gai izango direla uste duela erantsi du.

Hau zure interesekoa bada, baliteke beste gai hauek ere izatea
Nazioartea Migrazioa Ameriketako Estatu Batuak Arrazismoa Mexiko Eguneko albisteak Albisteak Donald Trump Ultraeskuina