Mundua -

AEB

Mexikori, Kanadari eta Txinari ezarritako muga-zergak sinatu ditu Trumpek

Gainera, Donald Trump presidenteak esan du gauza bera egingo duela Europar Batasunarekin, AEB "oso gaizki" tratatzen duelako.

Donald Trump AEBko presidentea. Argazkia: EFE
Donald Trump AEBko presidentea. Argazkia: EFE
Donald Trump AEBko presidentea. Argazkia: EFE

agentziak | eitb media

Whatsapp Facebook Twitter Telegram Email

Karoline Leavitt Etxe Zuriko bozeramaileak baieztatu duenaren arabera, datorren asteartean sartuko dira indarrean Donald Trump AEBko presidenteak Mexikoko, Kanadako eta Txinako inportazioei ezarritako muga-zergak.

"Presidenteak % 25eko muga-zerga ezarriko dio Mexikori, % 25ekoa Kanadari eta % 10ekoa Txinari dozenaka milioi estatubatuarren heriotza eragin duen legez kanpoko fentaniloa gure herrialdean barreiatzeagatik", adierazi du prentsaurreko batean.

Muga-zerga horiek AEBko ekonomian eragin dezaketen kalteaz galdetuta, Leavittek erantzun du Trumpek atzera egiteko aukera duela, hala nahi izanez gero.

Justin Trudeau Kanadako lehen ministroak balizko muga-zergei erantzun "irmoa" eta "arrazoizkoa" emango diela hitzeman ostean iritsi da neurria.

Muga-zergak Europar Batasunari

Gainera, AEBko presidenteak esan du Europar Batasunak bere herrialdera bidaltzen dituen produktuei ere ezarriko dizkiela muga-zergak, baina ez du zehaztu ez zein produkturi ez noiz sartuko diren indarrean.

"Oso gaizki tratatzen gaituzte. Ez dituzte gure autoak onartzen, ez dituzte gure nekazaritza-produktuak onartzen; ez dute ia ezer onartzen, eta defizit handia dugu Europar Batasunarekin. Beraz, zerbait oso garrantzitsua egingo dugu EBrekin, balantza orekatu behar dugu", gaineratu du agintariak.

Merkataritza-balantza kezka-iturri handi bihurtu da Trumpentzat, 2023an EBk superabita lortu baitzuen inportazio eta esportazioen balantzan AEBrekin, 502.000 milioi euroko esportazioak eta 340.000 milioi euroko inportazioak egin baitzituen, Europako Batzordearen arabera.

Hau zure interesekoa bada, baliteke beste gai hauek ere izatea
Nazioartea Europar Batasuna Ameriketako Estatu Batuak Txina Mexiko Eguneko albisteak Albisteak Donald Trump Kanada