Mundua -
'Savile' auzia
Gary Glitter abeslaria atxilotu dute adingabeei sexu-abusuak egotzita
60ko hamarkadan Jimmy Savile BBCko aurkezleak adingabeei ustez egindako abusuekin lotura duelakoan atxilotu dute Glitter 68 urteko artista.
Erredakzioa
68 urteko Gary Glitter Erresuma Batuko pop abeslaria atxilotu dute Londresen, 60ko hamarkadan Jimmy Savile BBCko aurkezleak adingabeei ustez egindako sexu-abusuekin lotura duelakoan.
Vietnamen adingabeei abusuak egiteagatik zigortu zuten Glitter 2006an. Halaber, hainbatetan auzipetu zuten Erresuma Batuan haur pornografia izatea leporatuta. Glitter Londresen duen etxean atxilotu dute eta Polizia-egoitzan deklarazioa hartu diote birritan, Erresuma Batuko komunikabideek jakinarazi dutenez.
Salaketa dokumental batean
BBCk zabaldutako dokumentalean hainbat lekukok salatu zutenez, Glitterrek adingabeekin harreman sexualak izan zituen aurkezlearen aldagelan, telebista publikoko saio batean parte hartu ostean. Ondorioz, Poliziak testigantzak ikertu ditu eta azkenean, atxilotu du.
Jimmy Savile 60ko hamarkadako Erresuma Batuko telebistako pertsonai ezagunetarikoa izan zen. Aipatutako dokumentalean azaldutako beste hainbat lagunek Savilek adingabeei sexu-abusuak ustez egin izana salatu zuten. Savile 2011ko urrian hil zen, 84 urte zituela.
Ustezko sexu-abusu hauek joan den urriaren 3an jakitera eman zituen ITVko dokumental bati esker. Ordutik Poliziak 130 lagunekin hitz egin du eta 114 salaketa aurkeztu dituzte. Litekeena da 300 biktima inguru egotea.