Teslak gora egin du, Muskek Trumpen Gobernuan gutxiago parte hartuko duela iragarri berritan

Tesla enpresaren akzioak % 5 baino gehiago suspertu dira burtsan, AEBko konpainiak urteko lehen hiruhilekoan bere irabaziak % 71 apaldu —409 milioi dolarretaraino— eta Elon Musk handi-mandiak enpresako kontuetan buru-belarri ariko dela eta Donald Trumpen gobernuan gutxiago parte hartuko duela iragarri berritan.

Atzo, saioaren amaieran Teslaren akzioek % 4,6 egin zuten gora teknologia berrien Nasdaq burtsa indizean, eta 237,97 dolarreko langan zeuden, baina after hour deituriko merkatuan % 5eraino gora egin zuten.

Auto elektriko ekoizleak zabaldutako datuen arabera, salmentek eragindako irabaziak 13.967 milioi dolarrekoak izan ziren urteko lehen hiruhilekoan, aurreko urteko aldi berean baino % 20 gutxiago.

Testuinguru horretan, Elon Muskek iragarri du maiatzetik aurrera denbora gutxiago ariko dela politikagintzan eta gehiago, berriz, Tesla konpainian.