Mundua -
AEB
Trumpek dio ez dela hirugarren agintaldiaren bila ari, eta Vance eta Rubio aipatu ditu 2028rako hautagai gisa
Martxoan, Trumpek berak aipatu zuen hirugarren agintaldiaren aukera, jende askok berriro aurkezteko eskatzen ziola adieraziz. Handik gutxira, "Trump 2028" leloa zeramaten biserak eta kamisetak saltzen hasi zen.
AGENTZIAK | EITB MEDIA
Duela gutxi "Trump 2028" leloa duen merchandisinga atera duen arren, Donald Trump Ameriketako Estatu Batuetako (AEB) presidenteak adierazi du ez dela hirugarren agintaldiaren bila ari, eta 2028ko hauteskundeetan JD Vance presidenteordea zein Marco Rubio Estatu idazkaria izan daitezkeela hautagai posibleak.
"Zortzi urtez izango naiz presidente. Bi agintaldiko presidentea izango naiz. Beti pentsatu izan dut hori oso garrantzitsua dela", esan du Trumpek ostiralean Floridan NBC katerako grabatutako elkarrizketa batean. "Ez da onartzen luzatzea, gainera, nik dakidanez. Ez dakit arrazoi konstituzionalengatik edo beste arrazoi batengatik den", erantsi du.
Martxoan, Trumpek berak aipatu zuen hirugarren agintaldiaren aukera, jende askok berriro aurkezteko eskatzen ziola adieraziz. Handik gutxira, "Trump 2028" leloa duten biserak eta kamisetak saltzen hasi zen.
"Jende asko ari da 2028ko bisera saltzen, baina ez da bila ari naizen zerbait. Lau urte bikain izan nahi ditut, eta erreleboa eman norbaiti, errepublikano handi bati. Uste dut lau urte nahikoa direla zerbait benetan ikusgarria egiteko", azaldu du.
Trumpek ziurtatu du beretzat askoz garrantzitsuagoak direla 2026ko agintaldi erdiko hauteskundeak, Alderdi Errepublikanoak serie historikoa hautsi eta Kongresuko bi ganberetan duen gehiengoa mantentzen saiatuko baita. Hauteskunde kanpainan paper "oso aktiboa" izango duela iragarri du agintariak, dohaintzak sustatuz bereziki.