Friedrich Merzek porrot egin du kantziler izateko lehen saiakeran

Friedrich Merz kontserbadoreak porrot egin du Parlamentuko Behe Ganberan Alemaniako kantziler izateko lehen saiakeran. Lehen aldiz gertatu da Errepublika Federalean: behar zituen 316 botoak ez ditu bildu eta "kantzilerraren gehiengoa" bezala ezagutzen dena lortzeko sei boto falta zaizkio.

Uste zenaren aurka, Batasun Demokrata Kristauak (CDU), Batasun Sozial Kristauak (CSU) eta Alderdi Sozialdemokratak (SPD) ez dute gehiengo osoa lortu.

Hiru alderdi horiek Bundestag Parlamentuko 630 eserlekuetatik 328 dituzte, baina Merzen hautagaitzak 310 diputaturen babesa baino ez du jaso, behar baino sei gutxiago. Horrek esan nahi du adostutako koalizioko gutxienez bostek aurka bozkatu dutela.

Ezarritako prozeduraren arabera, hautagaiak ez badu gehiengo osoa lortzen hauteskundeen lehen itzulian, bigarren fasea egin behar da, 14 eguneko epean asko jota.

Horretan Merz berriro aurkez daiteke, baina beste hautagai bat ere aukeratzea ere badago.

Bigarren fase hori ere antzua izanez gero, Legebiltzarrak berehala bozkatu behar du hirugarren bozaldi batean.

Herrialdearen historian, kantziler izateko hautagai batek ere ez du inoiz huts egin gobernuburu izateko lehen ahaleginean, eta Merzen kasuan, ezusteko handia izan da, Batasun Kristaudemokratak (CDU) eta Batasun Sozialkristauak (CSU) zein Alderdi Sozialdemokratak (SPD) osatutako bloke kontserbadoreak hamabi botoko tartea baitzuen. Botoa sekretua da.

Oraingoz, bigarren bozketa noiz egingo den eztabaidatzen ari dira, baina Carsten Linnemann CDUren idazkari nagusiak adierazi du bere ustez "zuzena" litzatekeela astearte honetan bertan izatea.

"Europa eta mundua ez dira gure zain geldituko, egonkortasuna laster etortzea behar dugu", adierazi du, eta prozesua arin egiteko eskatu du, munduan dagoen segurtasun falta ikusita.

"Egonkortasuna emango duen Gobernua behar dugu", azpimarratu du.