Mundua -
Gaza, erasopean
Gazako genozidioa Eurovision jaialdian sartu da, bigarrenez
Jaialdia hasi baino ordu batzuk lehenago, Israelen parte-hartzearen aurkako protesta jendetsuak izan dira Basilean eta Europako beste hiri batzuetan. Israelgo abeslaria txistu artean eta bandera palestinarrekin hartu du publikoak, eta Belgikako Telebistak emisioa eten du orduan.
EITB MEDIA
Israel Gazan egiten ari den sarraskiak (53.000 palestinar baino gehiago hil ditu dagoeneko) bere oihartzuna izan du, bigarren urtez jarraian, aurten Suitzako Basilea hirian, larunbat honetan izandako Eurovision jaialdian.
Jaialdia hasi baino ordu batzuk lehenago, protesta jendetsuak izan dira Basilean eta Europako beste hiri batzuetan, Israel Eurovision jaialdian parte hartzearen aurka, "United for Palestine" lelopean. Suitzako Poliziak manifestarien aurka egin du hainbat unetan, piperbeltz gasa ere erabilita.
Norvegiak eta Herbehereek ere antzeko mezuak erakutsi dituzte, eta Belgikako Telebistak emisioa eten du Israelgo abeslariaren emanaldian. Emisioa etenda zuen bitartean, mezu bat erakutsi du Israelgo Gobernuak prentsari jarritako betoa salatu eta su-etena eskatzeko.
Protestak gorabehera, 2023ko urriaren 7ko atentatuetatik bizirik ateratako Yuval Raphael Israelgo ordezkaria jaialdiaren agertokira igo da, eta publikoak txistu artean hartu du. Gainera, bandera palestinarrak ere erakutsi dituzte, askok sakelako telefonoarekin. Dena dela, ez da iazko boikotaren mailara iritsi.
Azkenik, Israel finalera iritsi da, besteak beste, Espainiako telebotoen 12 puntuak jasota, baina Austriak lortu du kristalezko mikrofonoa, "Wasted love" kantarekin.
