Ukrainak inoizko erasorik handiena egin du Errusiako hegazkinen aurka, Turkian negoziatzeko elkartu bezperan

Ukrainak inoizko erasoaldi handiena egin du gaur Errusiako hainbat aire base militarren aurka. Drone bitartez, Errusiako Armadaren dozenaka hegazkin suntsitu ditu, bonbaketariak eta ikuskatze hegazkinak tartean.

Ukrainako Inteligentziaren arabera, 40 bat hegazkin suntsitu dituzte, eta, iturri batzuen arabera, horrelako 60 inguru ditu Errusiak. Horrek erasoaren tamaina erakusten du.

Kamioiz, ezkutatuta eraman ditu droneak Ukrainak Errusiara, eta han, helburu militarretatik gertu zeudela, urrutiko aginduz aktibatu dituzte.

Orain arte inoiz ikusi gabeko erasoa izan da gaurkoa, eta Kremlinek berak ere onartu du gertatu dela. Siberiaraino iritsi dira droneak.

Zazpi hildako bi tren errailetatik aterata

Bestalde, Errusiak Ukrainari leporatu dio igande honetan mugako eskualdeetan bi trenekin gertatu dena. Bi tren errailetatik atera dira leherketa batzuen ondorioz, eta zazpi pertsona hil dira.

"Ukrainak aspaldi galdu zituen estatu baten ezaugarriak, eta gune terrorista bihurtu da, mugarik gabe, organo legitimorik gabe eta legerik gabe", Errusiako agintarien hitzetan.

Kievek berehala ukatu ditu Moskuren akusazioak, eta Errusiari berari leporatu dio erasoaren ardura. "Beste behin ere, gu 'herrialde terrorista' gisa aurkezteko tentazioa dago, elkarrizketa ukatzeko eta Sumy eta Zaporizhia eskualdeetan hasi eta ekialdean jarraitzen duen udako erasoaldiarekin jarraitzeko", esan du Telegramen Zelenski presidenteak.

Hori guztia biharko hitzordu garrantzitsuaren bezperan gertatu da. Ondo bidean, Ukrainako zein Errusiako ordezkariak Istanbulen bilduko dira gerrari amaiera ematen saiatzeko.