Mundua -
LAGUNTZA HUMANITARIOA
Askatasunaren Flotillako lehen lau ekintzaileak deportatu ditu Israelek
Deportaziorako dokumentuak sinatu ez dituzten gainerako zortziak dagokion agintaritza judizialaren aurrera eramango dituzte, kanporatzeak baimentzeko.
AGENTZIAK | EITB Media
Askatasunaren Flotillako 12 ekintzaileetako 4 deportatu ditu jada Israelek, deportazio dokumentuak sinatu ondoren, eta gainerako zortziak dagokion agintaritza judizialaren aurrera eramango dituzte, horien kanporatzeak baimentzeko.
Loubna Tuma Askatasunaren Flotillako kideen abokatu israeldarrak azaldu duenez, dagoeneko deportatu dituztenen artean daude Greta Thunberg suediarra, Sergio Toribio espainiarra, eta Omar Faiad (kazetaria) eta Baptiste Andre (ekintzailea).
Astelehen goizaldean Israelek nazioarteko uretan atzemandako Askatasunaren Flotillako 12 ekintzaileak atzo Euskal Herrian 20:00ak zirenean Axdoden porturatu eta Tel Aviveko (Israel) Ben Gurion nazioarteko aireportura eraman zituzten.
Aireportuan deportazio dokumentua sinatzeko aukera eman zieten, Israelen legez kanpo sartu zirela onartuz, baina lauk bakarrik onartu zuten. Gainerako zortziek uko egin zieten eta Ramla hiriko espetxera eraman zituzten, gaur epailearen aurrera eraman aurretik.
Israelgo Atzerri Ministerioak X sare sozialean argiratutako mezu batean azaldu duenez, Madleen ontzian zihoazenei beren herrialdeetako kontsulek harrera egin die.
