Gazte bat desagertu da Arga ibaira erorita, Iruñean

Nafarroako Larrialdietarako Zerbitzua 26 urteko gazte baten (R.A.G.) bila ari da Arga ibaian, Iruñean. Argitu gabe dauden arrazoiak tarteko, gaztea ibaira erori da eta ur-korronteak eraman du.

Nafarroako Gobernuak agiri baten bidez azaldu duenez, gertakaria 04:45 inguruan jazo da, Iruñeko Igeriketa Klubaren pasabidearen inguruan.

Gertakariaren unean lagunekin zegoen desagertutako gaztea, baina ezin izan dute ezer egin erorketa ekiditeko eta berehala 112 larrialdi zerbitzura deitu dute jazotakoa ohartarazteko.

Desagertzearen tokian eta handik 200 metrora, El Molino zentrotik gertu dagoen presaren inguruan, ari dira gaztearen bila.

Suhiltzaileak, foruzainak, Gurutze Gorria eta DYAko langileak ari dira bilaketa-lanetan parte hartzen. Osasunbideako psikologo bat ere bertaratu da eta desagertzearen lekuan postu bat jarri du Nafarroako Larrialdietarako Zerbitzuak.