Reala: Erritmoari eutsi nahi dio Lasartek

Zubietako prentsa aretoan agertu da gaur goizean Martin Lasarte. Azken bi jardunaldietan pilatutako uzta eskasegia izan arren, ez du uste bereziki eragingo duenik horrek jokalariengan. "Nahi baino puntu gutxiago ditugu. Liga luzeegia denez, bagenekien halako zailtasunak izango genituela. Oinazerik utzi ote digun jakitea da garrantzitsuena baina jokalari multzoarentzat laprastada bat baino ez da izan. Hala behar du gainera".

Kontrarioen itxaropena zapuzte aldera, ahulezia zantzurik ez du ikusi nahi Murtzian. "Orain arteko intentsitatea mantentzeko gai garela erakutsi behar diegu gainontzeko taldeei, helburua lortzeko nahia ez zaigula desagertu".

Ondoren, Las Palmasen kontrako neurketa bukatu osteko prentsaurrekoan adierazitakoa argitu nahi izan du. Taldeak fisikoki behera egin zuelakoan azaldu zen. "Jokalari gutxi batzuez ari nintzen konkretuki. Ez nuen hori esan nahi. Guk datuak baditugu eta horiek aztertu ostean jakin genuen korrika gehien egin zuten hirugarren partida izan zela, beraz, horrek ez nau kezkatzen".

Kontrarioaz ere mintzatu da. Celtaren traza hartzen dio. "Izenez eta izatez sailkapenak dioena baino gehiago da. Talde horrek gorago behar lukeen. Markagailua irauli zuen azken neurketan eta indartuta iritsiko dira". Lasaiegi zelairatu ez daitezen Lasartek uste du onuragarria dela aurkariak egonezina sortzea Jokalari zerrenda eman du ezagutara entrenamenduaren ostean. Zigorra bete ostean, Bravo itzuli da Asier Riesgoren partez. Astean zehar kili-kolo aritu arren Labaka eta Elustondo ere sartu dira. Bilbotik abiatuko dira bihar goizean hegazkinez eta Mallorkako Palman geldialdia egin ostean iritsiko dira Murtziara. Talde gorri-biziaren entrenamendu zelaian burutuko dute azken lan saioa.