Jesus Torquemada
Iruzkina
Ayatollah-ek amore ematea nahi du Trumpek
Jesus Torquemada
Washingtonek espero du, epe labur edo ertainean, Iranen kontrairaultza piztea. Bestela, zigor ekonomikoen bitartez eroriaraziko du.
Trumpi ez zaio aski Iranekin sinatutako akordio nuklearretik ateratzea. Bere estrategia askoz ere urrunago doa: Ayatollahen erregimena eraitsi nahi du. Horrelaxe, disimulurik gabe esan berri du Mike Pompeo Estatu idazkari berriak. Iranen kontrako zigor askoz ere gogorragoak iragarri zituen atzo. Pompeok esan zuen Ameriketako Estatu Batuek (AEB) Iranekiko presioa bakar-bakarrik arinduko duela, baldin eta hark misilak egiteari uzten badio eta Irak, Siria, Libano eta Yemenetik erretiratzen bada. Akordio nuklearrak ez zuen halakorik jasotzen. Iranek leherkari nuklearrak egiteari utziko ziola, baina ez zuen Iranen atzerri politika baldintzatzen ezta misilak egiteko bere gaitasuna mugatzen ere.
AEBk zera dute helburu: Israelentzat Iranek dakarren mehatxua neutralizatzea. Eta zein bide jarraituko duen horretarako? Ayatollahei presio egingo die Iranek inguruko herrialdeetan duen esku-hartzea bertan behera utz dezaten. Edota bestela, zigor ekonomikoen bitartez eroriaraziko ditu.
Iranek oso populazio gaztea du. Ez zuten 1979ko iraultza ezagutu. Gazte horiek nazkatuta daude Ayatollahei ezarritako murrizketekin eta amaierarik ez duten zailtasun ekonomikoekin. Washingtonek badaki hori eta, orain espero du, epe labur edo ertainean, Iran barrutik bertatik piztuko dela kontrairaultza. Trumpek uste du eskura duela, baina ayatolek 40 urte daramatzate eusten, eta badirudi oraindik indartsu daudela.
