Bake prozesua -
3 urte jarduera armaturik gabe
Ipar Irlandako adituak EAEn gaur, bakegintzan laguntzeko
Iñigo Urkullu lehendakaria adituokin batzartuko da gaur. Brian Currin abokatua ere etortzekoa da asteon.
Erredakzioa
Ipar Irlandako eta SEUPBko (EBko Programa Bereziak Kudeatzeaz Arduratzen den Erakundea) adituz osatutako ordezkaritza bat Euskadira etorriko da gaur, Euskadiko hainbat erakunde-arduradun eta gizarte-eragilerekin bilerak egiteko, Europako bake eta bizikidetza arloko egitasmoetan elkarlanean aritzeari begira.
SEUPB Europako Batzordeko erakunde bat da eta Peace Programme kudeatzeaz arduratzen da; hau da, Europako Gizarte Funtsen barruko Ipar Irlandako –Irlandaren eta Eskoziako Mendebaldearen arteko mugako eskualdea– bake- eta adiskidetze-programetako bat kudeatzeaz.
Eusko Jaurlaritzak ohar baten bidez jakinarazi duenez, aurtengo urtarrilean Eusko Jaurlaritzako eta SEUPBko ordezkariek Belfasten topaketa bat egin zuten eta haren ondorioz dator bisita. Topaketa hartan, euskal ordezkaritzak bertatik bertara ezagutu ahal izan zituen Ipar Irlandan Europako erakundeen babesarekin gauzatzen ari diren bizikidetza sustatzeko egitasmoak.
Oraingoan -Eusko Jaurlaritzako Bake eta Bizikidetzarako Idazkaritzak antolatuta-, Irlandako ordezkaritza, SEUPB (Pat Colgan buru duela), Urkullu lehendakariarekin bilduko da gaur, eta 22tik 24ra Bilbon egingo den topaketa batean parte hartuko du.
Topaketaren helburua hirukoitza da: bakearen eta bizikidetzaren inguruan Euskadin lortu nahi den helburua Europar Batasunean partekatzea; Europar Batasunarekiko lankidetza-esparru praktiko bat antolatzea, bakea finkatzeko eta bizikidetza-kultura berri bat sustatzeko, eta bakearen eta bizikidetzaren eremuan politika espezifikoak garatzen ari diren Europako beste eskualde batzuekin esperientzia erabilgarriak trukatzeko aukera ezartzea.
Currin ere, Euskadin
Nazioarteko Egiaztatze Batzordea, Brian Currin hegoafrikarrak gidatuta, Euskadiko bake prozesua sustatzen ahaleginduko da, 23tik 25ra egingo duen bisitan, Aieteko Adierazpenetik eta ETAk behin betiko jarduera armatua utzi zuela iragarri zuenetik hiru urte bete direnean.
Batzordearen inguruko iturriek Europa Press albiste-agentziari jakinarazi diotenez, aditu horien bisitak ez dauka zerikusirik Ipar Irlandako eta SEUPBko adituen bisitarekin.
Aipatutako iturrien arabera, kointzidentzia hutsa da Nazioarteko Egiaztatze Batzordearen eta Ipar Irlandako eta EBko adituen bisita aste berean izatea.
