Barcenas auzia -
Barcenas auzia
Rajoyren aurkako akzio politikoak eta judizialak iragarri ditu PSOEk
De Cospedalek diruzain ohiaren eta Rajoyren arteko "paktu sekretu" bat jakinarazi du, eta "PPren eta Barcenasen arteko lotura nagusia Rajoy dela", kasuaren "epizentroan" dagoela, PSOEren arabera.
Erredakzioa
Oscar Lopez PSOEko Antolakuntza idazkariak Mariano Rajoy Gobernuko presidentearen dimisioa eskatu du asteazken honetan, Maria Dolores de Cospedal PPko idazkari nagusiak "foku nagusia" harengan jarri ostean, Luis Barcenas diruzain ohiarekin izandako akordioko (alderditik kobratzen jarraitzeko eta defentsa ordaintzeko) arduraduna bera zela esatean.
Lopezen ustez, diruzain ohiaren eta Rajoyren arteko "paktu sekretu" bat jakinarazi du, eta "PPren eta Barcenasen arteko lotura nagusia Rajoy dela", hau da, kasuaren "epizentroan" dagoela.
Horregatik, PSOEk Rajoyren aurkako akzio judizialak eta politikoak ekingo dituela iragarri du, bereziki, Parlamentuan "paktu sekretua" zergatik ezkutatu zuen argitzeko. Haren hitzetan, Rajoy "egoera jasanezinean" dago, orain "ez delako Barcenas jaunaren hitza Rajoyrenaren aurka", idazkari nagusiaren hitza baizik, bera hatzarekin seinalatu duela.
"Orain, badirudi ez zela gaizkile baten xantaia, gaizkile horrekin Gobernuko presidenteak zuen paktua baizik, Cospedal anderea entzun ostean", adierazi du, PSOEko egoitzan. Hori dela eta, sozialistek "ahal bada, lehen baino indar gehiagorekin" Rajoyren dimisioa eskatuko dutela azpimarratu du, eta, gainera, akzio legalei eta parlamentarioei ekingo dietela, zehaztu ez dituen arren.
