EITBk erregearen mezua ematea 'guztion eskubidea da', PPren ustez

Carlos Garcia Elorrion PPren zinegotziak esan duenez, euskal irrati telebistak Estatuburuaren hitzaldia ematea "euskal herritar guztion eskubidea da". Halaber, EH Bilduko ordezkariei "erakundeetan ETAren ordezkariak" izatea leporatu die.

esRadiori egindako adierazpenetan, Euskadin "traizionatuta" eta "umiliatuta" sentitzen diren sozialista asko daudela azaldu du Garciak, koalizioak Gipuzkoako Aldundiarekin hitzartutako aurrekontuetako akordioaren harira.

Datozen urteetan EITBk erregearen mezua ematen jarraituko duela uste izanda, zinegotziak adierazi du "euskal herritar guztion eskubidea" dela telebista publikoak "Estatuburuaren mezua bezalako oinarrizko gauzak igortzea".

Horren haritik, EH Bilduk erregearen mezua igortzearen aurka protesta egiteko astelehen honetan EITBren egoitzaren aurrean egindako kontzentrazioa kritikatu du. Halaber, EH Bilduko ordezkariei "erakundeetan ETAren ordezkariak" izatea leporatu die.

"ETAk duela hiru urte bonba bat jarri zuen leku berean egin dute kontzentrazioa, eta, garai hartan, ez zen agerraldirik egin", kritikatu du.