Soilik 'ezkortasuna eragiten' aritzea egotzi dio Urkulluri Ugarteburuk

Maribi Ugarteburu ezker abertzalearen bozeramailearen hitzetan ''eskandalua'' da inbestidura saioa egin eta hilabetera Urkulluren Jaurlaritza berriak etorkizunerako dituen asmoen inguruan agerian uzten ari den ''zehaztasuna falta'', eta ekonomia mailan soilik ''ezkortasuna eragiten'' aritzea egotzi dio lehendakariari.

Infozazpi irratian egin duen elkarrizketa batean, Urkulluren jarrera kritikatu du Ugarteburuk, ezker abertzaleko ordezkariaren ustez lehendakariak ez duelako Jaurlaritza berriak krisia, normalizazio politikoan, autogobernuak zein subiranotasuna bezalako oinarrizko gaietan zein asmo duen aurreratu.

''Ez dakigu ezer ez aurrekontuetaz, eta aurretiazko babesaren eta egonkortasunaren mezuarekin jarraitzen dute; baina argi dago inork ez diola baietzik emango proiektu horren edukia ezagutu gabe'', gaineratu du.

Sorturekin bat egingo du Batasunak

Ostegun honetan desegitea iragarri ondoren, Iparralde Batasuneko kideek Sorturekin bat egingo dutela baieztatu du Ugarteburuk.

Sortuk Iparralden ''errito eta egutegi ezberdinekin'' abiatuko dela argitu du ezker abertzaleko bozeramaileak, baina ''egin egingo'' dela ziurtatu du, eta ''otsailaren 23ko hitzordura' elkarrekin'' joango direla aurreratu du.

Segi

Segiko kide izateagatik Auzitegi Gorenak zigortu zituen Errenteriako bost gazteetako hiruk "ezkutatzeko" hartutako erabakiaz ere aritu da Ugarteburu, eta, ''maila horretako bidegabekeriak eta jazarpen polizial, judizial eta politikoak ekiditeko horma-euskarria'' osatzera deitu ditu herritarrak. ''Hau ez da bakarrik ezker abertzaleak duen arazo bat; gizarte gisa dugu arazo bat da'', gaineratu du.