Bildurekiko jarreragatik atsekabea agertu diote hainbat kidek Muñozi

EH Bilduko eta ELAko hainbat kidek eskutitza bidali diote Adolfo "Txiki" Muñoz sindikatu horretako idazkari orokorrari, horien hitzetan ELAk EH Bilduren kontra ''agerian uzten duen jazarpenagatik ezustea eta atsekabea'' agertzeko.

Gutuna sinatu duten hamabi bat kideen ustez, ''alde handia dago kritikaren eta jazarpenaren artean''.

Halaber, EH Bilduri egindako kritikek ''kalte handia'' egiten dutela ohartarazi dute, ''bi arrazoirengatik'': batetik ''beste alderdietatik jasotzen dituzten kritikei gehitzen zaizkielako'', eta, bestetik, ''alderdi guztiak berdinak direla'' esaten duen mezua helarazten zaielako herritarrei.

Gipuzkoako aurrekontuak

Bilduk Gipuzkoan onartu dituen aldaketa fiskalak direla-eta, PSE-EErekin ituna egitea ''aukera bakarra'' izan dela uste dute eskutitza sinatu duten ELAko kideek, eta ''EH Bilduk aurrera eraman nahi duen eredu aldaketa bideratzeko jasotzen ari den laguntza eskasaren isla da'', horien hitzetan.

Funtzionarioen aparteko soldata

Gabonetako ordainsaria dela-eta ELAk Donostiako Udalean deitutako 'kazerolada' kritikatu dute, eta Javier Maroto eta Iñaki Azkuna Gasteizko eta Bilboko alkateen kontra neurri bera hartu ez izana salatu dute.

Joseba Andoni Llaguno Sopuertako (Bizkaia) alkatearekin batera, EAEko hainbat udalerritako zenbait zinegotzik sinatu dute gutuna.