Duran i Lleida: 'Ez dut dimisioa emango, noski ezetz'

Josep Antoni Duran i Lleida Unio Democratica de Cataluñaren (UDC) presidente eta CiUren Kongresuko bozeramaileak argi adierazi du ez duela dimisioa emateko asmorik, nahiz eta frogatuta geratu den bere alderdiak legez kanpoko finantziazioa jaso zuela 90eko hamarkadan.

"Ez dut dimisioa emango, noski ezetz. Bere garaian alderdiak ardura politikoak hartu zituen, zigorra jaso dutenak kanporatu genituen edo euren kabuz atera ziren alderditik. Bestalde, ikerketa batzordea jarri genuen abian alderditik kanpoko jendearekin", adierazi du Duran i Lleidak La Tercera egunkari txiletarrean egindako elkarrizketa batean.

CiUko kideak azaldu duenez, 2000. urtean "egoera irregularren bat" egongo balitz ardurak bere gain hartuko zituela esan zuen, baina ukatu egin du irregulartasunak izan direla. "Ez dago finantziazio irregularrik, eta ardura politikoak hartu genituen bere garaian", berretsi du.

Gainera, "ebazpena ezagutu aurretik" oposizioko alderdiek dimisioa eskatu izana kritikatu eta alderdiari ez diotela "finantziazio irregularra leporatu" azpimarratu du.

"Fiskalak argi adierazi du gertatutakoaren inguruan ez genuela berririk, ezta inputatuen akordioen berri ere. Unio Democratica ez dago inputatuta, ezta zigortuta ere. Etxebizitza bat baduzu eta zure etxean lanean ari den pertsona batek iturria irekita uzten badu, ez duzu nahita egin, ez dago zigorrik, baina gastatutako ura ordaindu beharko duzu, erantzukizun zibil subsidiarioa da", Duran i Lleidaren arabera.