Urizar: 'Urkulluk ez dizkio Rajoyri gizartearen eskaerak helaraziko'

Urkullu Mariano Rajoy Espainiako presidentearekin datorren urtarrilaren 30ean bildu aurretik, euskal alderdiekin "irizpideak ezartzeko" ez bildu izana leporatu dio Pello Urizar EAko idazkari orokor eta EH Bilduko legebiltzarkideak. Ildo honetan, EAJren proposamenak helaraziko dizkiola uste du, "euskal gizartearenak beharrean".

Eusko Alkartasunaren afiliatuekin egindako bilera batean, Urkulluren eta Rajoyren arteko lehen bilera egiteko era "okerra" dela esan du Urizarrek, "Euskal Herriko alderdiekin hitz egin baino lehen, Rajoyren Gobernuarekin hitz egingo duelako".

Horren iritziz, "horrela egitea akatsa da, EAJren proposamenak soilik helaraziko dizkiolako eta EAEko herritar guztien lehendakari gisa joan beharko litzateke", gaineratu du.