Politika -
Barcenas auzia
Iñigo Urkulluk PPren baitan gertaturikoa argitzeko eskatu du
Salaketak azken muturreraino argitzeko, eta, behin hori eginda, dagozkion erantzukizun guztiak bere gain hartzeko eskatu dio Alderdi Popularrari.
Iñigo Urkullu lehendakariak Barcenas auzia azken muturreraino argitzeko eskatu dio Alderdi Popularrari.
San Telmo museoko "Badu Bada" erakusketa ikusten izan da ostiral honetan lehendakaria, eta irteeran kazetarien galderei erantzun die. Kezka azaldu du Iñigo Urkulluk PPren baitan egon omen diren irregulartasunak direla eta.
Lehendakariaren hitzetan, lehenengo gertaturikoa argitu behar du, eta, behin hori eginda, "dagozkion erantzukizunak hartu behartu ditu bere gain Alderdi Popularrak".
"Alderdi Popularrak berak eman ditzala bere kontuen gaineko argibideak, ondoren gainerako alderdiek azalpen horien gaineko balorazioa egin dezagun", gaineratu du. Horrela, politikagintzari min gehiago egitea eragotziko duela uste du.
Politikagintzari min handia egiten ari zaio auzi hau, Urkulluren ustez, eta, honenbestez, dagozkion ardurak bere gain hartzeko eskatu dio PPri.
PPko kargudun publikoen dimisiorik beharrezko ikusten ote duen galdetuta, bihar Alderdi Popularreko zuzendaritzak egitekoa duen bileraren zain dagoela esan du.
