Politika -
10 urte 'Egunkaria' gabe
Guardia Zibilak Arantzazuko santutegian ere sartu nahi izan zuen
200 guardia zibil Madrildik abiatu ziren, baina Burgosen atzera egin zuten, Joan Mari Torrealdaik eta Martxelo Otamendik azaldu dutenez.
Erredakzioa
2003. urteko otsailaren 24an, hau da, Euskaldunon Egunkaria itxi eta lau egunera, Guardia Zibila Arantzazuko (Oñati) santutegira abiatu zen, bertan ere polizia operazioa egiteko helburuz, baina, azken unean, atzera egin zuen, Martxelo Otamendi Egunkaria-ko zuzendari ohiak eta Joan Mari Torrealdai Administrazio Kontseiluko presidente ohiak azaldu dutenez.
"Ez da anekdota bat, egia kontrastatua baizik. Sarraski bat egiteko asmoa zuten, barra libre zegoen", esan du Torrealdaik, "Faktoria" Euskadi Irratiko saioan egindako elkarrizketa batean, Egunkaria itxi zutela 10 urte betetzen diren honetan.
"Otsailaren 24an, 200 guardia zibil Madrildik abiatu ziren Arantzazura, baina, Aranda de Dueron (Burgos), norbaitek Madrilera itzultzeko agindua eman zuen", adierazi du Otamendik, "Boulevard" Radio Euskadiko saioan.
Horren ustez, euskal gizarteak Egunkaria-ren itxieraren aurrean eman zuen erantzuna izan zen Guardia Zibilak atzera egiteko arrazoia: "Herritarrek eraso gehiago izatea galarazi zuten, eraso gehiago aurrez ikusita zeuden eta. Adibidez, badakigu otsailaren 24an 200 guardia zibil Madrildik abiatu zirela Arantzazuko santutegira, euskararen ikurretako bat baita". "Euskal gotzain ohi batek asko daki horri buruz", erantsi du.
"Perspektibarekin ikusita absurdoa da, baina egia da", gaineratu du Torrealdaik.
Egunkaria-ren Administrazio Kontseiluko presidente ohiaren esanetan, Guardia Zibilak teorizatuta zuen "dena da ETA" tesia, eta euskararen mundua "desegitea" interesatzen zitzaion.
