Politika -
Espetxe politika
Herrira Europako parlamentariekin biltzen hasiko da astelehenean
Herrirako ordezkaritza bat Europako erakundeekin eta parlamentariekin bilduko da "espetxe politikaren helburua mendekua beharrean irtenbidea izan dadin".
Erredakzioa
Herrira presoen eta errefuxiatuen eskubideak defendatzen dituen mugimenduaren ordezkaritza bat Bruselara joango da astelehen honetan. Beñat Zarrabeitia, Emilie Martin, Irune Agirre abokatua eta Jone Artola 13 herrialdeetako parlamentarirekin bilduko dira, eta denera, 25 bilera baino gehiago egingo dituzte. "Espetxe politikaren helburua mendekua beharrean irtenbidea izatea" bultzatu nahi dute.
Estrasburgoko Giza Eskubideen Auzitegiak hilaren 20an egingo duen bisitaren aurretik egingo dituzte bilerak. Orduan, Ines del Rio auzia berrikusiko dute, eta Herrirak esan duenez, "epaiak erabateko garrantzia izango du espetxe zigorra bete eta espetxean jarraitzen duten 72 presorentzat".
"Parot doktrina bertan behera uztea giza eskubideak errespetatzea da, euskal preso politikoei zigorrak bidegabe luzatzen dizkielako". Mugimenduaren iritziz, "salbuespenezko neurri horiekin amaitzeak, bakeari bultzada emango lioke".
25 bilera baino gehiago egingo dituzte besteak beste Frantziako, Alemaniako, Finlandiako eta Suediako parlamentariekin. Halaber, euskal parlamentariekin ere bilerak egingo dituzte.
