Oroimenaren inguruan 'adosteko ahalegina' eskatu du Eusko Jaurlaritzak

Jonan Fernandez Eusko Jaurlaritzako Bake eta Elkarbizitzarako idazkari nagusiak adierazi duenez, oroimenaren gaineko eztabaida politikoa ezin da bakarrik "iritzi desberdinen alderatzea izan", ondorioz, Eusko Legebiltzarreko alderdiei "era baketsuan eztabaidatzeko ahalegina" eskatu die, auzi horiek "sakontasunean lantzeko".

Ohar baten bidez Fernandezek azaldu duenez, Eusko Jaurlaritzaren helburuetako bat oroimenaren politika publikoa sustatzea eta garatzea da. "Bakerako eta Elkarbizitzarako Plangintzan argi eta garbi izango da ikusgai, Memoriaren eta Elkarbizitzaren Institutua horren proiektua delako", aditzera eman du.

Halaber, Terrorismoaren Biktimen Oroimenari buruzko proiektuaren barnean, terrorismoaren biktimek tratamendu "zehatza" izango dutela iragarri du Fernandezek. Plangintza horren diseinua Espainiako Gobernuak eta Eusko Jaurlaritzak partekatu behar izango dute.