Politika -
Bake prozesua
Garitanoren ustez, ez dago normaltasunik 700 preso politikorekin
Gipuzkoako ahaldun nagusiak gogoratu duenez, ETAk Aietek eskatutako urrats guztiak bete ditu, baina Espainiako eta Frantziako Gobernuek ez dute bat ere bete.
Erredakzioa
Martin Garitano Gipuzkoako ahaldun nagusiak adierazi duenez, inork ez du uste 700 preso politiko dituen gizarte bat normaltasunez bizi dela. Gainera, Espainiako Gobernua "ainguratuta" dagoela salatu du.
Radio Euskadin egindako elkarrizketa batean, Garitanok Arnaldo Otegi Batasunako bozeramaile ohia EH Bilduk egiten duena egiteagatik bost urte espetxean dagoela gogoratu du, "Euskal Herria gobernatzeko politika bat garatzeagatik, eta 300.000 boto baino gehiago izateagatik".
Gogoratu duenez, ETAk Aietek gomendatutako urratsak bete ditu, baina Espainiako eta Frantziako Gobernuek ez dute halakorik egin. Hala, Garitanok nabarmendu du: "Ez dakit ETAk nahikorik egin duen edo ez, baina argi dut Gobernuek ez dutela ezer egin".
Gipuzkoako ahaldun nagusiaren iritziz, Espainiako Gobernuak ezin du "Mariano Rajoyren pasotismoarekin ainguratuta jarraitu eta 'mugitzen ez banaiz ez da ezer gertatzen' esanez", euskal gizartea hori gerta ez dadin mugituko delako.
