Edari alkoholdunetan 24.000 euro gastatzea leporatu diote EAJri Lemoan

Lemoako (Bizkaia) Udaleko EAJko aurreko gobernuak edari alkoholdunetan 24.000 euro gastatu zituela salatu du asteazken honetan Saioa Elejabarrieta (Bildu) egungo alkatesak.

Elejabarrietak emandako datuen arabera, gainera, justifikatu gabeko gastuak ordaintzeko kreditu txartela erabili zuten EAJko kideek, eta, guztira 6.000 euro xahutu zituzten.

Halaber, diru publikoa erabiliz, lau urtez bidaia-klub bateko kide izateko gastuak ordaindu zituzten, eta kilometroak ordaintzeko dietetara 50.000 euro bideratu zituzten, alkatesaren arabera.

Aitor Erauzkin zinegotziarekin batera prentsaurrekoa eskaini du Bilbon Elejabarrietak, Bilduk ohar batean jakitera eman duenez.

Agerraldi horretan salatu dutenez, joan den legegintzaldian zehar, Lemoako Udaleko zazpi kidek sei hilerik behin 3.000 kilometroko dietak pasatu zizkioten Udalari, eta Lemoako egungo agintarien ustez, baliteke horiek ''gainsoldatak'' izatea.

Diru-partida horien helburua zein zen frogatzen duten dokumentatuak dituztela adierazi duten Lemoako alkatesak eta zinegotziak.