'Frankismoan heriotza-zigorra ezarri zietenei merezi zuten'

Frankismoan "heriotza-zigorra ezarri zietenei merezi zutelako izango zen", adierazi zuen Manuel Jose Gonzalez Capon (PP) Barallako (Lugo) alkateak osoko bilkura batean. Alkateak atzera egin eta barkamena eskatu du gaur.

Adierazpenak egin izana onartu du alkateak, baina osoko bilkuraren "eztabaida" testuinguru batean kokatu ditu. "Epaituak eta zigortuak izan ziren pertsonek ordaindu behar zutela esan nuen, hitz horiekin ala beste batzuekin", azaldu du Gonzalez Caponek.

PSGren arabera, Resistencia Galega taldearen indarkeria ekintzak gaitzesteko PPren mozio bat eztabaidatzen ari ziren. Horrela, sozialistek "indarkeria ekintza guztiak gaitzesteko" eskatu zuten, "egilea bat edo bestea izan".

Puntu honetan, beti alderdi sozialistaren bertsioa jarraituz, popularrei "beste ekitaldi mota batzuk gaitzesteko sentsibilitatea" erakustea eskatu zieten, "besteak beste, diktadurako hilketak"; horrek "haserre biziko erantzuna" eragin zuen.

Orain, Gonzalez Capon "ados" azaldu da "era batean edo bestean zoritxarreko esaldia" izan zela esatean, barkamena eskatu du, eta esandakoa baztertu. "Ez dago eragozpenik gauza bat gutxi gorabehera batek pentsatzen duen testuinguru baten barruan ez denean, atzera egin, barkamena eskatu eta listo", nabarmendu du.

Hala eta guztiz ere, gai hori hurrengo udalbatzarrean eztabaidatuko dute, PSGk esan duenez, alkateak "formalki" barkamena eskatzea eskatuko baitu, "gizarte demokratikoan onargarriak ez diren hitz mingarriengatik". "Erabat mespretxagarriak dira", adierazi du.